நாராயண மூர்த்தியும் போதை மருந்தும்

காந்திஜியின் வழியில் பீடு நடை போடும் இந்தியாவின் ஒரே நடுநிலை நாளிதழான ஒரு பத்திரிக்கையில் வந்துள்ள செய்தி மிகவும் அதிர்ச்சி அளிக்கின்றது. எப்போது உண்மையே பேசும் அந்த பத்திரிக்கை எப்போதும் ஜாதி, மதம் பார்க்காத பத்திரிக்கை. எனவே அந்த செய்தி உண்மையாக இருக்கும் என சந்தேகம் எழுந்துள்ளது.

"சாப்ட்வேர்' நிறுவனங்களில் பணியாற்றும் இளம் இன்ஜினியர்களால் நாட்டில் பெரும் கலாசார சீரழிவு ஏற்பட்டு வருகிறது. புனே அருகே நடத்தப்பட்ட போதை விருந்து போல நாடு முழுவதும் நடந்து வருகிறது. இந்த போதை விருந்துகளை, "சாப்ட்வேர்' நிறுவனங்களே நடத்துவதும் அம்பலமாகியுள்ளது.

இதே போல போதை விருந்து சென்னையிலும் நடந்திருக்கிறது. இதில், 25 ஆண்களை கைது செய்து, விடுவித்ததும் தெரியவந்துள்ளது. இந்த தகவல்களால் பெற்றோர்கள் பெரும் கவலை அடைந்துள்ளனர். இந்தியாவில் கம்ப்யூட்டர் புரட்சி வெடித்து, லட்சக்கணக்கான இளைஞர்களுக்கு வேலை வாய்ப்பு கிடைத்து வருவது அதிகரித்து வருகிறது. குறிப்பாக ஐந்தாறு ஆண்டுகளாக, "சாப்ட்வேர்' இன்ஜினியர்களுக்கு தாறுமாறான சம்பளம் உயர்ந்துவிட்டது. இதையடுத்து "பி.பி.ஓ.,' என்று அழைக்கப்படும், "கால்சென்டர்களும்' நாடு முழுவதும் தொடங்கப்பட்டன.

இதில், பணியாற்றும் இளைஞர்களுக்கும், இளம் பெண்களுக்கும் கைநிறைய சம்பளம் கிடைக்கிறது.இந்தியாவில் கிடைக்கும் தாராளமான சம்பளத்தை எப்படி செலவழிப்பது என்று தெரியாமல், பல்வேறு ஆடம்பர வாழ்க்கைக்கு தயாராகி விடுகின்றனர். கட்டுப்பாடின்றி சுற்றித் திரியும் இன்ஜினியர்கள் ஓரிரு ஆண்டுகளில் தங்களது நிறுவனம் சார்பில் வெளிநாடுகளுக்கு சென்று விடுகின்றனர். அங்கே உள்ள கலாசாரம் இன்னும் அவர்களை கெடுத்து அனுப்பி வைக்கிறது.

வெளிநாட்டில் இருந்து இங்கே வந்ததும், மீண்டும் சம்பளம் எகிறுகிறது. அப்பணத்தையும் வெளிநாட்டு கலாசாரத்தையும் இணைத்துக் கொண்டு வாழ்வதால், இந்தியாவின் கலாசாரம் பெரிதும் சீரழிகிறது. இந்த கலாசார சீரழிவுக்கு காரணம், "சாப்ட்வேர்' நிறுவனங்களே என்று குற்றம் சாட்டப்படுகின்றன.கம்ப்யூட்டரில் பணியாற்றுபவர்களுக்கு மன அழுத்தம் அதிகமாக ஏற்படுகிறது என்பதால் தான் வாரத்திற்கு இரண்டு நாட்கள் விடுமுறை அளிக்கப்படுகிறது. மன அழுத்தத்தை போக்கிக் கொள்ள அந்தந்த, "சாப்ட்வேர்' நிறுவனங்களே பலவித பொழுதுபோக்கு நிகழ்ச்சிகளுக்கு ஏற்பாடு செய்கிறது.இப்படி ஆரம்பிக்கும் நிகழ்ச்சிகளில் கொஞ்சம் கொஞ்சமாக பீர், பிராந்தி, விஸ்கி என்று தொடங்கும்.

பிறகு, போதைப் பொருள் பழக்கத்தையும் உருவாக்கி விடுகின்றனர். இந்த நிகழ்ச்சியில் தங்கள் விருப்பப்படி பெண்களை கட்டியணைத்து நடனமாடுவார்கள். அதன் பிறகு அவர்களுக்கு இடையே நெருக்கம் அதிகமாகி, "செக்ஸ்' வரை சென்று விடுகிறது.இது போன்ற போதை விருந்துகள் நாடு முழுவதும் நடக்கிறது. அப்படி நடந்த விருந்து தான் புனே சம்பவம். இச்சம்பவம் தமிழகத்தில் உள்ள பெற்றோர்களையும் கவலை அடையச் செய்துள்ளது. "சாப்ட்வேர்' நிறுவனங்களில் பணியாற்றும் இளைஞர்களையும், இளம் பெண்களையும் வைத்து பெரும் கும்பல் போதை விருந்துகளை ஏற்பாடு செய்கிறது.

இந்தியாவின் எல்லா நகரங்களிலும் இது போன்ற போதை விருந்து நடத்தப்பட்டு வருகிறது. இமாச்சல பிரதேசத்தில் உள்ள குலுமனாலியில் தான் அதிக அளவில் போதை விருந்து நடத்தப்படுவதாக தகவல்கள் கிடைத்துள்ளன. சென்னையிலும் இது போன்ற போதை விருந்து நடத்தப்பட்டு வந்தது.சென்னையிலிருந்து மகாபலிபுரம் செல்லும் கிழக்கு கடற்கரை சாலையில், இப்படி போதை விருந்து நடத்தப்பட்டுள்ளது. சமீபத்தில் 25 ஆண்களை மட்டும் போலீசார் கைது செய்து, விடுதலை செய்து விட்டனர். அந்த விருந்துக்கு 500 ரூபாய் கட்டணமாக வசூலிக்கப்படும். உள்ளே சென்று எதை வாங்கி சாப்பிட்டாலும், பணம் தர வேண்டும். அதில் கலந்து கொள்பவர்கள் குறைந்தது இரண்டாயிரம் ரூபாய் வரை செலவு செய்ய நேரிடும் என்று கூறப்படுகிறது. சென்னையில் நடந்த போதை விருந்தில் பெண்களும் பங்கேற்றுக் கொண்டனர். ஆனால், போலீசார் இளம் பெண்களை மட்டும் கைது செய்யாமல் எச்சரிக்கை செய்து வீட்டுக்கு அனுப்பி விட்டனர்.மத்திய, மாநில அரசுகளின் கடும் சட்ட திட்டமும், போலீசாரின் கடுமையான நடவடிக்கைகளும் தான் இதுபோன்ற கலாசார சீரழிவுகளை தடுக்க முடியும் என்பதே கவலை அடைந்துள்ள பெற்றோர்களின் கருத்து.

செய்தி கிடைத்த இடம்

மேலே குறிப்பிட்டுள்ள செய்தி உண்மையா? ஆம் எனில், நாட்டை கெடுக்கும் நாராயண மூர்த்தி, பிரேம்ஜி மற்றும் முண்ணனி சாப்ட்வேர் நிறுவனங்களின் தலைவர்களை என்ன செய்யலாம்? இது நம் பாரத தேசத்திற்கு விடப்பட்டுள்ள ஒரு அறைகூவல். தேசப்பற்றுள்ள பதிவர்கள் இதை பற்றி விரிவாக விவாதிப்பார்கள் என்று நம்புகின்றேன்.

வந்தே மாதரம். ஜெய்ஹிந்த்.